Mei he 'Ofisi Palemia, Monite 22 'o Tisema 2008:

‘Oku fakafuofua ko e pa’anga Tonga ‘e $19.7 miliona na’ e tanaki mai ki he ‘ikonimika ‘o e fonua ‘e he ouau mo e Katoanga Hilifaki Kalauni ‘o ‘Ene ‘Afio, Kingi Siaosi Tupou V.

Ko e ola ia ‘o e savea mo e fakatotolo na’e fakahoko ‘e Toketa Semisi Taumoepeau, fakataha mo e kautaha fakatotolo ki he ngaahi me’a faka-Takimamata ‘a Nu’u Sila  ko e New Zealand Tourism Research Institute (NZTRI). Ko e kautaha ko eni ko e va’a ia ‘o e ‘Univesiti Faka-Tekinolosia ‘o ‘Okalani (Auckland University of Technology), pea ‘oku Talekita ai ‘a Palofesa Simon Milne. Ko Toketa Semisi Taumoepeau foki ko e Talekita –malolo ia ‘o e Potungaue Takimamata ‘a e Pule’anga Tonga pea ‘oku ne lolotonga Pule ‘i he Polokalama Ako ki he Takimamata mo e Talitali Kakai ‘a e Auckland Institute of Studies St Helens ‘i ‘Okalani. ‘Oku ne toe hoko foki ko e Tokoni Talekita ‘i he NZTRI.

Na’e pehe ‘e Toketa Semisi Taumoepeau, “’Oku hoko ‘a e ngaahi katoanga makehe ‘oku fokotu’utu’u ‘e he ngaahi fonua ‘i he Pasifiki Saute ko ha tapuaki ki he ngaahi fonua ni he ‘oku ne fakatupu hangatonu ‘a e ngaahi monu’ia faufauua mei he ngaahi fakamole ‘a e kau folau‘eve’eva kae’uma’aa e ngaahi ma’u’anga pa’anga fo’ou ‘oku ne pusiaki’i. ‘Oku hanga ‘e he Katoanga Hilifaki Kalauni ‘o Kingi Siaosi Tupou V ‘i ‘Aokosi ‘o e ta’u ni ‘o fakataataa’i mahino ‘a e ngaahi tapuaki ko ia.”

Na’e toe pehe ‘e Toketa Taumoepeau ‘oku fakafuofua ki he toko 6,600 ‘a e kau folau na’a nau ‘a’ahi mai ki Tonga ni koe’uhi ko e Katoanga Hilifaki Kalauni pea na’a nau faka’eke’eke ‘a e toko 500-tupu ‘o kinautolu fakataha mo e ngaahi kautaha pisinisi ‘e 40-tupu. Na’a ne toe pehe ko e pa’anga ‘e $19.7 miliona koeni na’e tofuhia ai ‘a e sekitoa faka’ikonimika kehekehe ‘o e fonua ‘o kau ai ‘a e ngaahi fale-talifononga, ngaahi me’alele fefononga’aki totongi, ngaahi falekai, ngaahi supamaketi mo e falekoloa, kau ngaue fakame’aa, kau ngoue mo e kau toutai, pea mo e ngaahi pisinisi talitali kakai.
 
Fakatatau ki he ngaahi fika kuo toki tukumai ‘e he Potungaue Takamamata, na’e fe’unga ‘a e kau folau na’a nau tu’uta vakapuna mai ki Tonga ni ‘i Siulai 2008 mo e toko 6,618, ‘a ia ‘oku hulu‘aki ia ‘a e peseti ‘e 50 nai mei he tokolahi na’a nau tu’uta mai ‘i Siulai ‘o e 2007 ‘a ia na’e fe’unga mo e toko 4,446. ‘Oku mahino mei he ngaahi fakamatala mei he Potungaue ni na’e ‘i ai mo e tupu ‘i he tokolahi ‘o e kau folau’eve’eva na’a nau tu’uta vakapuna mai ‘i ‘Akosi mo Sepitema 2008 ‘i hono fakafehoanaki ki he ongo mahina tatau ‘i he 2007.

Na’e me’a ‘a e ‘Eiki Palemia, Toketa Feleti Sevele ‘o pehe, “’Oku hanga ‘e he ola ‘o e savea mo e fakatotolo ne fakahoko ‘e Toketa Semisi Taumoepeau pea mo e NZTRI ‘o fakatonuhia’i ‘a e fakafuofua na’a mau fakahoko ki he ngaahi monu’ia faka’ikonomika ‘o e Katoanga Hilifaki Kalauni. Ko hono mo’oni ‘oku meimei liunga ua ‘a e pa’anga ‘e meimei $20 miliona ‘oku nau fakafuofua’i na’e tanaki mai, ‘i he lahi ‘o e pa’anga ko ia na’a mau ‘uluaki fakafuofua’i ‘e kimautolu.”    

Issued by:  The PMO Website Bureau, Prime Minister's Office, P.O. Box 62, Nuku'alofa, Tonga.
                Telephone:  (676) 24 644     Fax:  (676) 23 888   Email: This e-mail address is being protected from spambots. You need JavaScript enabled to view it     

Mei he 'Ofisi 'o e Palemia, Nuku'alofa 3 Tisema 2008: ‘E fakalangilangi’i ‘e he Pule’anga Tonga ‘a e fefine Tonga na’a ne ikuna’i ‘a e Metali Koula ‘i he tolo me’amamafa ‘i he Olimipiki 2008, Valerie Vili, ‘aki ha talitali fakafonua ‘i he efiafi ‘o e ‘aho ni. ‘Oku ‘amanaki ke fakahoko ‘a e talitali koeni ki he Hotele Dateline pea ko e ‘Eiki Palemia, Toketa Feleti Vaka’uta Sevele, pea mo e Talafekau Lahi mei Nu’u Sila, tena talitali ‘a e kau fakaafe.  

Na’e tu’uta mai ‘i he pongipongi ni ki Tonga ni ‘a Valerie pea mo hono hoa, kae’uma’aa hono tehina, pea mo hono famili ofi ‘i ha’anau folau ‘eve’eva nounou ke fai ha fe’iloaki mo e kainga ‘o ‘ene fa’ee. Ko e fefine mei he Mapu ‘a Vaea ‘a ‘ene fa’ee, ka kuo ne si’i pekia.

‘I he ‘Olimipiki na’e fai ki Beijing ‘i ‘Aokosi ‘o e ta’u ni, na’e pule’i fakaaoao ‘e Valerie ‘ae tolo me’amamafa, ‘aki ‘a ‘ene fuofua tolo ‘a ia na’e mita ‘e 20.56 ‘a hono loloa. Na’e ‘ikai ke toe lakahake ha tolo ‘ihe ‘ene tolo ko ia pea ko e loloa ia na’a ne ikuna’aki ‘a e metali koula. Ko e fefine pe ‘e taha na’e ofiofi hake ‘a ‘ene tolo ‘o laka ‘i he mita ‘e 20, ‘a ia ko e fefine mei Belarus pea ko ia na’a ne ikuna ‘a e metali siliva. ‘I he ‘ene tu’u ‘i he ‘ahoni, ‘oku pule’i fakaleveleva ‘e Valerie, ta’u 23, ‘a e tolo me’a mamafa, he koia ‘a e Hau ‘o Mamani, Olimipiki, pea mo e Sipoti Kominiueli foki.

Ne’ongo ko ‘ene folau ‘eve’eva pe ka ‘oku ‘I ai ‘a e ‘amanaki ‘e kau atu ‘a Valerie ki he ni’ihi ‘o e ngaahi polokalama ‘o e Uike Sipoti Fakafonua (30 Nov-5 Tisema) ‘a ia ‘oku lolotonga fakalele ‘e he Komiti Fakafonua ki he Fakalakala ‘o e Sipoti pea mo e Potungaue Ako Ngaue, Ma’u Ngaue, To’utupu mo e Sipoti.

‘Oku ‘amanaki foki ke fai hano talitali makehe ‘o Valerie pea mo e kau folau ‘e he ‘Eiki Nopele ma’u tofia’, Paloni Vaea ‘o Houma pea mo hono kainga ‘i he ‘aho Sapate, ko hono 7 ‘o Tisema. ‘Oku ‘amanaki ke foki atu ‘a kau folau ki Nu’u Sila he ‘aho Pulelulu ko hono 10 ‘o Tisema 2008.

Issued by:  The PMO Website Bureau, Prime Minister's Office, P.O. Box 62, Nuku'alofa, Tonga.
                Telephone:  (676) 24 644     Fax:  (676) 23 888   Email: This e-mail address is being protected from spambots. You need JavaScript enabled to view it     

From the Prime Minister's Office: Wednesday 3 December 2008: The Government of Tonga will honour 2008 Olympics Gold Medalist, Valerie Vili, with a reception in Nuku’alofa this evening. The reception will be jointly hosted at the Janful Dateline Hotel by the Prime Minister, Dr. the Hon Feleti Vaka’uta Sevele and the NZ High Commissioner, Ms. Christine Bogle.

Valerie Vili, together with her husband and sister and other members of her extended family arrived in Tonga from Auckland this morning on a short holiday and private visit to her late mother’s family and village. Valerie’s mother hailed from the chiefly village of Houma.

At the Beijing Olympics in August this year Valerie Vili completely dominated the shot put final with her first throw of 20.56 metres, which proved to be her winning throw. The only other competitor to throw above 20 metres was the eventual winner of the silver medalist from Belarus. At the age of just 23, Valerie has stamped her mark in the women's shot-put and is the current World, Olympic and Commonwealth champion.

Although she is on a private visit Valerie is expected to participate in some of the festivities and events associated with the National Sports Week (30 Nov -5 Dec) which is being run by the National Committee for Spots Development and the Ministry of Training, Employment, Youth and Sports.

Valerie Vili and her visitors will also be hosted by Baron Vaea of Houma and the people of Houma for a Church Service and Lunch on Sunday, 7 December. They are expected to depart Tonga on Wednesday, 10 December.

Mei he 'Ofisi 'o e Palemia, Nuku'alofa 13 Novema 2008: Na’e ‘a’ahi atu he ‘aho ni ‘a e ‘Eiki Palemia, Toketa Feleti Vaka’uta Sevele, ‘o me’a ki he nima ‘o e ngaahi hala ‘e hiva ‘oku lolotonga fakalelei mo fakafo’ou ‘aki ‘a e tokoni mei he Pule’anga ‘o Siaina. Na’e fakafe’ao ki ai ‘a e Minisita Ngaue, ‘Eiki Nopele Nuku pea mo e ‘Amipasitoa Siaina ki Tonga, Mr. Fan Quijin.

Ko e lahi taha ‘o e ngaahi hala ‘e hiva ‘oku fakafo’ou ko e ngaahi hala ki he ngaahi ngoue’anga, ‘a ia ‘oku fakatupu fiefia ki he kau fa’a. Fakatataa’aki ‘a e hala mei Masilamea ki Kala’au ‘i he vahe hihifo. Ko e hala ni ‘oku kilomita ‘e 2.72 hono loloa pea ‘oku fakatupu fiefia ia ki he kainga ‘o Kolovai, Ha’avakatolo pea mo Fo’ui ‘oku nau ‘api’uta mai ki he feitu’u ko eni. ‘Oku pehe pe mo e hala kilomita ‘e 2.51 mei ‘Otulau ki Liahona.

Ka ‘oku i ai foki mo e ongo fo’i hala nounouange ‘oku na fakatupu fiefia ki he kau tauhi fanau, he ‘e faingofuaange ‘a e fefononga’aki ‘enau fanau ki he ngaahi lautohi si’i. ‘Oku mo’oni eni ki he fo’i hala kilomita ‘e 0.76 ki he GPS Hala’ovave, ‘I Kolomotu’a, pea mo e fo’i hala ki he GPS Popua ‘i Ma’ufanga.

Ko e kautaha Siaina ko e Yan Jian Group Co. Ltd. ‘oku ne fakahoko ‘a e ngaue. Ka ko e kotoa ‘a e koloa ‘oku fai’aki ‘ae ngaue ‘oku fakatau fakalotofonua pe, hange ko e maka. ‘Oku nau fakangaue’i foki ‘a e kau ngaue Tonga ‘e toko 40 ki he 60. Pea ko e ngaahi misini ngaue ‘oku nau ngaue’aki ‘oku haea fakalotofonua pe. ‘Oku toe ngaue vaofi ‘aupito ‘a e kautaha ni mo e Potungaue Ngaue, ‘a ia ‘oku ne tokanga’i e ngaahi hala ‘o Tonga.

Na’e pehe ‘e he Taki ‘o e Ngaue, Mr. Qi Lu, na’a nau taketi’i ‘a Sanuali 2009 ke ‘osi ki ai ‘a e ngaue ka ‘oku hangehange ‘e ‘ikai tenau a’usia ‘a e taketi ni koe’uhi ko e lahilahi ‘a e ‘uha kuo ne ‘ahia ‘ae Fonua ‘i he lolotonga ni pea ‘oku ki’i faingata’a ki he ngaahi kautaha keli’anga maka kenau fakalato ‘a e lahi ‘o ‘enau fiema’u faka maka tanuhala ‘i he taimi ni. Ka na’a ne toe pehe ‘oku ne lotolahi ‘e ‘ikai ke fu’u mama’o ‘a hono faka’osi e ngaue mei he ‘aho na’e ‘uluaki taketi’i.


Na’e me’a ‘a e ‘Eiki Palemia ‘o pehe ko ‘ene fufofua ‘a’ahi eni ki he ngaue ‘oku fai pea ‘oku ne matu’aki fiefia ‘aupito ‘i he tu’unga ‘oku ‘iai ‘a e ngaue pea ‘oku ne tui ‘oku fiefia lahi mo e kakai ‘oku nau nofo ofi ki he ngaahi hala fo’ou ni. Na’a ne toe me’a ‘o pehe ‘oku ne ‘amanaki ko e kamata pe eni ‘o e tokoni mai ‘a Siaina ki hono ngaohi hota hala. Na’a ne fakamalo’ia ‘a Mr. Qi Lu pea mo ‘ene kau ngaue ‘i he ngaue kafakafa kuo nau lava ‘o fakahoko pea ne fakamalo’ia ‘a e Amipasitoa Siaina he tokoni mei hono pule’anga.

Na’e me’a ‘a e ‘Amipasitoa Siaina ‘o fakamalo’ia ‘a e ‘Eiki Palemia pea mo e ‘Eiki Minisita Ngaue ‘i he ‘ena tokanga mo ‘ena poupou makehe ki he ngaue ‘oku fai pea na’a ne fakapapau’i ko e loto ‘o e Pule’anga Siaina ke foaki ki Tonga ni ha ngaahi hala ‘oku matu’aki fakafiemalie.

Mei he 'Ofisi 'o e Palemia, Nuku'alofa 11 Novema 2008: Na’e paloti ‘a e Fale Alea he ‘aho 3 ‘o Novema ke ‘oua ‘e tali ‘a e Fokotu’u Faka’ilo faka-Fale Alea e ‘Eiki Minisitaa Takimamata, Fineasi Funaki, ‘a ia na’e fokotu’u ‘e he Fakafofonga Fika ‘Uluaki e Kakai ‘o Tongatapu, ‘Akilisi Pohiva pea mo e Kau Fakafofonga ‘o e Kakai.

Na’e fuofua ‘ohake ‘a e Fokotu’u Faka’ilo ‘i he ‘asenita e Fale Alea he ‘aho 30 ‘o ‘Okatopa pea na’e paloti ‘a e Fale (12 ki he 9) ke tuku hifo ki he Komiti Kakato. Ko kinautolu na’a nau loto ki ai ko: Samuela ‘Akilisi Pohiva, William Clive Edwards, ‘Uliti Uata, Sione Teisina Fuko, Sunia Fili, Sione Feingatau ‘Iloa, ‘Eiki Kovana Ha’apai, ‘Eiki Nopele Tu’I ha’ateiho, Eiki Nopele Luani, ‘Eiki Nopele Luani, ‘Eiki Nopele Ma’afu Tukui’aulahi, Pilinisi Tu’ipelehake mo ‘eiki Nopele Lasike.

‘I hono paloti’i ko ia ‘a e Fokotu’u Faka’ilo ‘i he Komiti Kakato pea mo e Fale Alea he ‘aho 3 ‘o Novema, ko Samuela ‘Akilisi Pohiva tokotaha pe na’e paloti ke tali ‘a e Fokotu’u Faka’ilo pea ‘ikai ke loto ki ai e toko 17.

Kimu’a pea fakahoko ‘a e paloti na’e fakahoko ‘e he ‘Eiki Palemia, Toketa Feleti Vaka’uta Sevele, ha fakamatala ki he tautea kuo ne ‘osi hilifaki ki he ‘Eiki Minisitaa ‘o fakatatau ki he uho ‘o e lipooti ‘a e ‘Atita. Na’e pehe ‘e he ‘Atita na’e ‘ikai ha taumu’a pe loto’aki ke kakaa’i ‘a e Pule’anga pea na’e ‘ikai ke mole ha pa’anga. Ka ko e to nounou ko e founga ngaue na’e ngaue’aki ‘e he Minisitaa na’e ‘ikai fenapasi mo e Lao.

Na’e fakamalanga ‘a Sione Teisina Fuko ‘o poupou ki he tautea na’e ‘osi hilifaki ‘e he ‘Eiki Palemia mo ‘ene kole ke fakamolemole’i ‘a e Eiki Minisitaa. Na’a ne me’a ki he kupu 75 ‘o e Konisitutone ‘o pehe, “’E ngofua ki he Kau Fakafofonga ‘o e Fale Alea ke faka’ilo (impeach) ha taha ‘o e Fakataha Tokoni, Minisita…koe’uhii ko ha taha ‘o e ngaahi hia ko eni. ‘I he kupu ‘uluaki…ko e maumau’i ‘o e Lao pe Tu’utu’uni ‘o e Fale Alea. ‘Oku ou fokotu’u atu ‘Eiki Sea, ‘oku ‘ataa e tokotaha ia ko ‘enii pea mei he kupu ko ia, pe, pule’i hala, ‘Eiki Sea, ‘e fokotu’u pe ia ‘o fakatatali he ‘oku ‘i ai e ngaahi me’a ke fakamo’oni ki ai. Pe ta’efe’unga, teu fokotu’u mo e kupu ko iaa ‘Eiki Sea ke fakatatali koe’uhii ko e ngaahi fakamatala ‘e fakahu mai ‘amuiange. Pee, mauamau’i pe kakaa’i ‘o ha koloa ‘a e Pule’anga. ‘Eiki Sea, ko e kupu mamafa eni ka kimu’a pea u hoko atuu teu lau atu ‘a e … me’a ‘a e ‘Eiki Palemia ki ho Falee ‘o fakatatau pea mo e report na’e ‘omai ‘e he Atita. “… Also it appeared there was no ill intention to defraud the Government and in fact no money was lost, the failure was that the procedures used by the Hon Minister were not in accordance with the Law.”

“Ko e faka-Tonga eni ki aii ‘Eiki Sea…’ikai ngata ai ka na’e ‘ikai ‘i ai ha taumu’a loto’aki ke kakaa’i ‘a e Pule’anga pe ko hono mo’oni na’e ‘ikai ke mole ha pa’anga ko e to nounou ‘a e founga ngaue na’e ngaue’aki ‘e he Minisita na’e ‘ikai fenapaasi mo e Lao. Koe taumu’a loto’aki ke kakaa’i, ‘ikai ‘i ai ha taumu’a loto’aki ke kakaa’i ‘a e Pule’anga pea ko hono mo’oni na’e ‘ikai ke mole ha pa’anga.”

“’Eiki Sea, ‘i he kupu 75 ‘i he konga ko ia ‘oku fakaha ai ‘e ngalingali fakatupu ha faingata’a he vaha’a ‘o e Fonua ni mo ha fonua kehe, ‘e faka’ataa ia. Pea ko e kupu ko e ‘Eiki Sea ‘oku pehe ai ke kakaa’i ‘o ha koloa ‘a e Pule’anga, ‘oku fakaha mai ‘e he ‘Atita ‘i hono lipooti … na’e ‘ikai ke ‘i ai ha loto kakaa ke kakaa’i ‘a e Pule’anga pea ko hono mo’oni na’e ‘ikai mole ha pa’anga.”

“Ko e ngaahi fact eni ‘oku ‘omai ki ho Fale. ‘Eiki Sea, ke fakapapau’i ‘oku pehe ni, ‘oku to leva ‘o tautau ‘a e ngaahi lea ko ‘eni. ‘Oku tautau ai ‘a e pule’i hala pea mo e ta’efe’unga koe’uhii koe fakalea ki mui ‘oku fakahoko mai ‘e he ‘Atita ko e to nounou ko e founga ngaue na’e ngaue’aki ‘e he Minisita na’e ‘ikai fenaapai mo e Lao, not in accordance with the Law. Ko e me’a leva Sea ‘oku ‘omi ki ho Fale, na’e fakaha mai ‘e he ‘Eiki Palemia na’a ne fai ‘e ia ‘a e tautea ‘i hono fatongia faka-Palemia ko e Pule Ngaue pea ‘oku ‘ikai keu fielave au ki he tautea ko iaa ka kuo ‘osi fai e tautea.”

“…’Eiki Sea, ‘ikai ke ‘iai ha pa’anga na’e mole, ‘ikai ke ‘iai ha koloa, ‘ikai ha fakakaukau kaka…. Ko e me’a leva ‘oku hoko ‘Eiki Sea na’e fai ‘a e kole fakamolemole ‘a e memipa ko’eni ‘i he letioo ki he kakai ‘o e Fonua, ka ‘i he aho ni ‘Eiki Sea na’a ne toe fai pea moe kole fakamolemole. Kehe ange mei he fokotu’u atu ‘oku ta’efakalao ‘a e founga ko’eni, ka ko e fakakaukau ki he fakakaukau ‘o e kole fakamolemole ‘Eiki Sea, koe’uhi he ‘oku te’eki ai ke tau ‘alu ki he hopo ke mahino ‘a e case, koau ko e fakafofonga Fale Alea ‘oku ou tui ‘Eiki Sea ki he me’a ko e fakamolemole.”

Na’e kau ‘a Sunia Fili pea mo ‘Etuate Lavulavu ‘i he fakamalanga ‘o poupou ke fai’aki pe ‘a e tautea kuo hilifaki ‘e he Eiki Palemia.


Issued by: The PMO Website Bureau, Prime Minister's Office, P.O. Box 62, Nuku'alofa, Tonga.

Telephone: (676) 24 644 Fax: (676) 23 888 Email: This e-mail address is being protected from spambots. You need JavaScript enabled to view it