|
Tokanga ‘a e Kapineti ki he Tu’unga ‘oku ‘i ai MV Olovaha |
Mei he 'Ofisi 'o e Palemia, Nuku'alofa 12 Novema 2008: ‘Oku fai ‘a e tokanga makehe ‘a e Kapineti ki he tu’unga ‘oku ‘i ai ‘a e MV Olovaha pea mo ‘ene polokalama fefolau’aki fakalotofonua ‘i he teuteu atu ko ia ki he Kilisimasi mo e faka’osi ta’u. Na’e mavahe atu foki ‘a e vaka ni ki Vava’u he po Monite ‘o e uike ni ka na’e foki fakavavevave mai ki Nuku’alofa he pongipongi Tusite hili ha palopalema fakatekinikale. Na’e to e mavahe atu ki Vava’u ‘i he efiafi Tusite, hili hano fakalelei e palopalema ni.
Na’e kau ‘a e kaveinga ni ‘i he fakataha ‘a e Kapineti ‘i he pongipongi ‘o e ‘ahoni pea na’e fakahoko ai ha tu’utu’uni ki he Poate ‘o e Shipping Corporation of Polynesia, ‘a ia ‘oku Sea ai ‘a e ‘Eiki Minisita Lao, ke ‘omai ha’anau lipooti ki he fakataha Kapineti ‘o e uike kaha’u ki he tu’unga ‘oku ‘i ai ‘a e MV Olovaha.
Na’e toe fiema’u foki ‘e he Kapineti ke kau ‘i he lipooti mei he Poate ha’anau fokotu’utu’u polokalama fefolau’aki ‘okapau ‘e ‘ikai ke lava ‘e he MV Olovaha ‘o fakakakato ‘a e ngaahi fefolau’aki fakalotofonua ‘oku fai ki ai ‘a e ‘amanaki.
Na’e me’a ‘a e ‘Eiki Palemia ‘o pehe, “Oku matu’aki tokanga ‘aupito ‘a e Pule’anga ki he ngaahi fiema’u faka vaka tahi ‘a e kainga mei he ngaahi ‘Otu Motu ki Tokelau pea kuopau ke fai ‘e he Pule’anga hono lelei taha ke feau ‘a e ngaahi fiema’u ko ia.”
Issued by: The PMO Website Bureau, Prime Minister's Office, P.O. Box 62, Nuku'alofa, Tonga.
Telephone: (676) 24 644 Fax: (676) 23 888 Email:
This e-mail address is being protected from spambots. You need JavaScript enabled to view it
|
