|
|
|
FAKA’ILONGA’I ‘A E KAMATA ‘O E LANGAFO’OU ‘O NUKU’ALOFA |
Mei he 'Ofisi 'o e Palemia, Nuku'alofa 18 Novema 2008: Na’e faka’ilonga’i ‘a e kamata ‘o e langafo’ou ‘o Nuku’alofa ‘aki ha ouau tanupou ‘i he tu’u’anga motu’a ‘o e falekoloa TCF ‘i loto Nuku’alofa ‘o hoko atu ki he fale ‘o e Kautaha Langafonua. Ko e Ta’ahine Pilinisesi ko Latufuipeka Tuku’aho na’e Fakaafe Fakalangilangi. Na’e kau atu ki he kau fakaafe ‘a e ‘Eiki Palemia, Toketa Feleti Vaka’uta Sevele, ‘Eiki Palemia Malolo, Paloni Vaea ‘o Houma, ‘Amipasitoa Siaina, Fan Guijin, pea mo e Talafekau Lahi ‘Aositelelia, Bruce Hunt.
Ko e ‘Eiki Minisita Fefononga’aki, Paul Karalus, ‘a ia ‘oku Sea ‘i he Komiti Fakatekinakale ki hono Langafo’ou ‘o Nuku’alofa ‘oku nau tokanga’i ‘a e polokalama langa, pea mo Zhao Zhonging, Tokoni Palesiteni ‘o e kautaha langa mei Siaina ko e CCECC, ‘a ia ‘oku ne fai ‘a e langa, na’a na talitali ‘a e kau fakaafe.
‘I he ‘ene me’a talitali ki he kau fakaafe, na’e me’a ‘a e ‘Eiki Minisita, Paul Karalus ‘o pehe, neongo ‘oku fakahoko ‘a e ouau tanupou hili ha ta’u ‘e 2 mei he ‘aho fakalilifu ‘o e 2006, ‘a ee na’e mole ai ‘a e ‘atamai munoa ‘o Nuku’alofa, kuo taimi ketau situ’a mei he kuohili ka e peluki hotau ngaahi tui, pea mapelu hotau ngaahi tu’a, ke langa ha Nuku’alofa fo’ou, ko ha kolo ‘oku tokalingolingoa ai ‘a e ‘ofa pea mo e melino. Na’a ne fakahoko mo ha fakamalo makehe ki he Pule’anga Siaina ki he ‘ene tukuange mai ‘a e sino’i pa’anga ke fakahoko mei e no ke fai’aki e ngaue.
‘I he lea talitali ‘a e Tokoni Palesiteni ‘o e CCECC, na’a ne pehe ‘oku matu’aki fiefia ‘a e Kautaha ke fakafo’ou honau va-fakangaue mo Tonga ni, ‘a ia na’e kamata’aki ha ngaahi langa ‘i he 2003, pea ‘oku nau mateuteu ke hoko atu ‘a ‘enau umo-uma-taha mo Tonga ni ‘i he fo’i ngaue ni. Na’a ne toe fakaha ai tenau ngaue’aki ki he lahitaha, ‘a e ngaahi kautaha taukeingaue fakalotofonua pea mo e kaungaue Tonga, lolotonga ‘a e fo’i ta’u ‘e tolu ‘o e ngaue.
Na’e me’a atu leva ‘a e Ta’ahine Pilinisesi ‘o fakakakato ‘a e ouau tanupou pea na’e tokoni ki ai ‘a Paloni Vaea ‘o Houma, ‘Eiki Palemia, ‘Amipasitoa Siaina, Tokoni Palesiteni CCECC, Faifekau Faka Tu’i, pea mo Hone Taumoepeau.
Ko e Palesiteni Le’ole’o ‘o e SUTT mo e Faifekau Faka Tu’i, Faifekau Toketa ‘Ahio, na’a ne tataki ‘a e ouau tapuaki ‘oe tanupou pea na’e tokoni ki ai ‘a e kau hiva ‘a e SUTT ‘o Fasi-mo-e-Afi.
Hili ‘a e ouau tanupou ‘e kamata leva ‘a e polokalama langafo’ou ‘aki e ngaahi ngaue kehekehe ‘o kau ai ‘a hono keli ‘o e konga’api TCF ke fakatoka e ngaahi paipa mo e halangavai pea ‘e hili ia ‘e hoko ‘a e konga’api ko ha ki’i paake ke fai ki ai ha malolo. ‘E fai foki mo ha ngaahi savea’i ‘o e ngaahi hala mo e ngaahi kauhala ‘o Nuku’alofa. Pea ‘e veteki mo e sino’ifale ‘oe Fale Taumoepeau, he’e kau ia ‘i he ngaahi fale ‘e kamata’aki ‘a e langafo’ou.
‘Oku ‘amanaki ke ta’u ‘e 3 ‘a e ngaue pea ‘e kau ki ai ‘a hono langafo’ou ‘o e ngaahi hala ‘e ni’ihi, ngaahi kauhala, ngaahi tafe’angavai, pea mo e ngaahi ngaue faka enisinia kehe pe, pea mo hono toe langafo’ou ‘o e ngaahi fale na’e mofia ‘i he 16/11.
Issued by: The PMO Website Bureau, Prime Minister's Office, P.O. Box 62, Nuku'alofa, Tonga.
Telephone: (676) 24 644 Fax: (676) 23 888 Email:
This e-mail address is being protected from spambots. You need JavaScript enabled to view it
|
|
