Kuo fakaha ‘e he ‘Eiki Palemia, Toketa ‘Aisake Valu Eke lolotonga ‘a e konifelenisi mo e kau faiongoongo he Tu’apulelulu, Sanuali 30, 2025 ‘a hono tali ‘e he Kapineti ke fakaava ‘a e ngaahi ‘ofisi ‘o e Ngaahi Potungaue e ni’ihi ‘o e Pule’anga ‘oku nau fakahoko fatongia fakapatonu ki he kakai, lolotonga ‘a e taimi ma’ume’atokoni ho’ata, ‘o kamata mei he Monite 3 ‘o Fepueli 2025.
Ko e taumu’a ‘o e ngaue ni ke fakafaingamalie’i e fakahoko fatongia ki he kakai e fonua ‘oku nau ngaue’aki ‘a e ngaahi sevesi ko eni. ‘E kaunga lelei eni ki he kakai ‘o Hahake mo Hihifo ‘oku nau lava mai ki kolo ni pea pau ke nau tatali he taimi ma’ume’atokoni ho’ata ke ava e ngaahi ‘ofisi ‘a e Pule’anga. ‘E lava heni ke ngaue’aki ‘a e ngaahi sevesi ko eni he taimi ‘aho kakato.
‘Oku kau ki heni ‘a e ngaahi Potungaue ko eni ‘a e Potungaue Pa’anga (Va’a ki he Pa’anga); Potungaue ki Muli (Va’a ‘Imikuleisoni); Potungaue Tukuhau mo e Tute (Va’a tafa’aki pa’anga mo e ngaahi ngaue ‘oku fiema’u mo e ngaahi Potungaue kehe pe.
‘E tukuatu ki he kau Minisitaa mo ‘enau kau Pule Ngaue ke nau vakai’i ‘a e ngaahi tafa’aki ‘i he’enau Potungaue takitaha ki ha fa’ahinga sevesi ke kei ngaue pe he lolotonga ‘a e taimi ma’ume’atokoni ho’ata. ‘E fanongonongo ki he fonua ‘a e ngaahi sevesi ko eni ke kamata he uike kaha’u, Monite 3 o Fepueli, 2025.