18 Tisema, 2020 ‘Oku fakafuofua ‘e ofi mai ‘a e Saikolone Fakatalopiki ko Yasa ‘i he pooni ki he potu tahi ‘o Tonga ni fakatatau ki he fakamatala ‘a e Talēkita ‘a e Va’a Fakamatala ‘Ea ‘a Tongá ‘Ofa Fa’anunu.
‘I ha fakataha ‘a e Kōmiti Fakafonua ki he Me’a Fakatu’upaké he pongipongi ‘o e ‘aho ni na’e fakahā ai ‘e Fa’anunu ‘oku fakafuofua ‘e a’u mai ‘a e matangí ki he ‘elia ‘o Tongá ‘i he malohi ko e “Kalasi 3” pea ‘e nga’unu ai pē ki he tafa’aki Tonga Tongahihifo ‘o Nuku’alofá ‘i he ho’atā ‘apongipongí.
“’A ia ko e ngaahi havilí kapau ‘e ha’u ai pē he halanga ko iá ‘e ‘i ai ‘a e ngaahi hakohako ki he tafa’aki fakahihifo ‘o Vava’ú, konga lahi ‘o Ha’apai, Tongatapu pea mo ‘Eua.”
Na’a ne pehē foki kuo ‘osi tuku atu ‘a e fakatokanga ki Vava’u pea mo e Ongo Niuá. “Totonu ke kamata pē ‘a e ‘uho’uha ia he taimi ni mei he Ongo Niuá pea hoko mai ai ki Vava’u he houa efiafi ‘o e ‘aho ni pea mo Tonga ni.”
‘I he fakamatala ‘a Fa’anunú, “’e ala maumau pē ha ngaahi fale ka ko e fanga ki’i palepale pē ia.”
‘E toe fakataha ‘a e kōmití ‘i he 4 efiafi ‘o e ‘aho ni ke talanoa’i ‘a e tu’unga ‘oku ‘i ai ‘a e saikoloné.
NGATA’ANGA
Tuku atu mei he: Potungāue Fakamatala ‘Ea, Ma’u’anga Ivi, Ma’u’anga Fakamatala, Tokangekina e Ngaahi Fakatamaki, ‘Ātakai, Feliuliuaki ‘o e ‘Ea mo e Fetu’utaki.
