20 ‘o ‘Aokosi, 2021 ‘Oku lolotonga lele māfana pē ‘a hono tauhi mo hono tufa ‘e he Va’a Ngāue ki he Mo’ui Lelei ‘a e Fanga Monumanú ‘a ia ‘oku fakamalumalu ‘i he Potungāue Ngoué ‘a ‘enau fanga moa kalasi kehekehe ‘e ua ke ‘inasi ai ‘a Tongatapu pea mo e ngaahi ‘Otu Motú foki.
Fakatatau ki he fakamatala ‘a e ‘Ōfisa Ngāue mei he Va’a Ngāue ki he Mo’ui Lelei ‘a e Fanga Monumanú Katalina Talia’uli na’e lele ‘a e polokalama ni hili ‘a Saikolone Gita pea hoko mai ‘a e Covid-19 pea hoko atu ai pē ‘a e polokalama tokoní.
“’Oku fakapa’anga ‘a e polokalama ni ‘e he Pule’angá, Tonga Health pea mo e sēniti pē ne ‘osi patiseti’i ‘e he potungāué ‘a ia ‘oku tokoni ke ‘omai ‘a e fanga ki’i moá mei Nu’usila. ‘Oku tokoni lahi foki pea mo e kāinga Siaina ‘i Tonga ni ki hono fakafofoa’i ‘a e fanga moá ‘o tuku mai ki he faamá ke tauhi ai ‘i ha uike ‘e ua pea toki tuku atu ki he kakai ‘o e fonuá.”
Fakatatau ki he’ene fakamatalá ko e kalasi moa ‘e ua ‘oku ma’u ‘i he faama moá ‘i Tokomololó ko e moa kakano ‘a ia ‘oku ‘aonga ki he ma’u me’atokoni faka’ahó pea mo e moa ‘oku fakatō.
“’Oku ‘ikai foki ke ‘i ai ha taimi ke pehē ‘oku lahi e fanga ki’i moá ‘i heni koe’uhí he ‘oku fiema’u pe ia he ‘aho kotoa pē. Ko e moa ‘e 10 ‘oku mau ‘ave ki he fāmili ‘e taha koe’uhí ke lava ‘a e fāmili takitaha ‘o tauhi ‘enau fanga ki’i moá ke nau mo’ui. Ko e ngaahi fāmili ‘oku tokolahí ‘oku malava pē ke ‘oange ha’anau fanga ki’i moa ‘e 20 kenau tauhi.”
Na’e pehē ‘e Katalina ko e moa kakano pe ne nau ‘uluaki ‘ave ki he Ongo Niuá pea ne nau toe kole mai ‘a e fanga ki’i moa fakato pea ne toe ‘ave mo ia fakataha mo e tangai fafanga na’e ‘osi ‘ota mai pē ‘e he kāingá.
“Ko e taha ‘eni ha polokalama ‘oku tokoni lahi ‘aupito ki he kakai ‘o e fonuá he ‘oku tokoni lahi kiate kinautolu ki he ma’u me’atokoni faka’ahó pea si’isi’i leva mo e pa’anga ‘oku fakamole ki he kumi puha moá mo e tray fua’imoá he ‘oku lava pē ia ‘o mau pe ‘i api.”
NGATA’ANGA
Tuku atu mei he: Potungāue Fakamatala ‘Ea, Ma’u’anga Ivi, Ma’u’anga Fakamatala, Tokangaekina Fakatamaki Fakaenatula, ‘Atakai, Feliuliuaki ‘o e ‘Ea mo e Fetu’utaki
