30 Ma’asi 2020 Kuo tuku mai ‘a e kole mei he Potungaue Polisi ‘a Tonga, mo e ngaahi va’a fengaue’aki ‘a ia ‘oku kau ki ai ‘a e Kau Tau ‘a ‘Ene ‘Afio, Tamate Afi pea mo e Pilisone ki he kakai ‘o e fonua ke nau fetokoni’aki ‘i he muimui pau ki he ngaahi tu’utu’uni ‘o e fefononga’aki ‘i he hala pule’anga lolotonga ‘a e taimi fakataputapui fakafonua ko eni.
Fakatatau ki he ‘Ofisa Ma’olunga mei he Potungaue Polisi ‘oku ne tokangaekina ‘a e ngaahi ngaue ki tu’a ‘i he taimi fakataputapui (Acting Superintendent – Tonga Police) Filipe Fifita ‘oku ‘i ai ‘a e ngaahi palopalema kuo nau fehangahangai mo ia mei he vaha’a taimi ko ia na’e kamata ai ‘a hono fakataputapui ‘a e fonua ki he pongipongi ‘o e ‘aho ni.
Na’e pehe ‘e Fifita ko e tu’utu’uni ko ‘eni ko e tu’utu’uni fakapule’anga, pea na’e ‘i ai mo hono ‘uhinga ‘o e tu’utu’uni ko ‘eni ko e malu’i ‘a e kakai ‘o e fonua ‘aki ‘a e nofoma’u ‘i ‘api. ‘I he taimi tatau pe ‘oku ‘i ai pe ni’ihi ‘o e kakai e fonua ‘oku lahi ‘enau ma’u hala ki he tu’utu’uni ko ‘eni. Ko e me’a mahu’inga he fakataputapui ko eni, ‘oku fiema’u ke tau nofo ma’u pe ‘i ‘api he ko e fakataputapui ko eni ‘oku taimi nounou pe.
‘Oku mahino pe foki ‘a e ngaahi potungaue ‘a e pule’anga mo e ngaahi ngaue’anga ‘oku nau fakahoko fatongia ‘i he taimi fakataputapui ko ‘eni.
Na’a ne fakamamafa’i ‘a e mahu’inga ke ngaue’aki pe ‘a e ngaahi saliote misini ‘a e ngaahi potungaue ‘a e Pule’anga. ‘Ikai ke ngata ai ka ke fai ha femahino’aki ‘i he hingoa mo e tokolahi ‘a e kau ngaue ‘oku fiema’u ke nau ngaue he ‘aho takitaha ‘i he uike ni.
‘I loto ‘i he tu’utu’uni ko ‘eni kuopau ke sivi ‘a e me’alele kotoa pe. ‘I loto Nuku’alofa ‘oku ‘i ai ‘a e fai’anga sivi ‘e 5 ‘o makehe pe ia mei he ngaahi fai’anga sivi ‘i Hahake mo Hihifo.
Na’a ne kole foki ki he kakai ‘o e fonua kenau tokoni ange mu’a ki he ngaue ‘oku fakahoko ‘aki ‘a e mahu’inga ‘aupito ke ‘i ai ha’a nau ID, tautefito ki he ni’ihi ko e ngaue fakale’o ‘i he ngaahi pangike fakakomesiale mo e ngaahi hotele kae pehe foki ki he kau ngaue pausa koe’uhi ke fakapapau’i ‘a e ngaahi feitu’u ‘oku fakataumu’a ki ai ‘enau fononga.
Ko kinautolu ‘oku ‘ikai ke ‘i ai hanau ID ‘oku fiema’u ke nau fetu’utaki mai ki he Potungaue MEIDECC pea ‘omai ‘a e lisi ‘a ‘enau kau ngaue ‘e ngaue ‘i he ‘aho taki taha.
‘Oku mahino pe foki ‘a e ngaahi fiema’u vivili hange ko e fakatau mei falekoloa kae fakatatau kia Fifita ‘oku fiema’u ke toe fakapotopoto ange ‘a e ngaahi ‘uhinga ‘oku kei fai ai ‘a e fefononga’aki ‘a e kakai e ni’ihi.
Na’a ne fakamamafa’i foki ‘a e mafatukituki ‘a e fatongia ‘a e potungaue ‘oku nau fakahoko he ‘oku nau toe fakahoko fatongia ko e feinga ke tokangaekina e faihia mo e faito’o konatapu. ‘I he’ene lau ‘e malava pe hoko eni ko e taimi ke ke toe lahi ange ai ‘a e faihia mo hono ngaue’aki ‘a e faito’o konatapu.
NGATA’ANGA
Tuku atu mei he Potungaue Fakamatala ‘Ea, Ma’u’anga Ivi, Ma’u’anga Fakamatala, Tokangaekina Fakatamaki Fakaenatula, ‘Atakai, Feliuliuaki ‘o e ‘Ea mo e Fetu’utaki.
