27 ‘o Mē, 2021 Kuo Laumalie lelei ‘a e Ta’ahine Pilinisesi Lātūfuipeka Tuku’aho koe ‘Eiki Talafekau Lahi ‘o e Pule’anga Tonga ki he Pule’anga ‘Aositelelia ke fakaafe’i atu ‘a kimoutolu na’a nau kau ki he polokalama ngāue toli fua’i ‘akau (SWP) mo e polokalama taukei ngaue (PLS) ‘oku mou lolotonga fakahoko ngāue ‘i he polokalama ni ‘i ‘Aositelelia ni, pe na’a mou kau ki he ngaahi Polokalama ngāue ni, kau Faamá, kau pule ngāue, mo koe pe fakafo’ituitui, ke mou ‘omai ha ‘ata, tā fakatātā, vitiō miniti ‘e 3-5, talanoa pe ko ha fakakaukau ke ne fakafōtunga ‘a e lelei ‘o e polokalama toli fua’i ‘akau (SWP) pe ko taukei ngāue (PLS).
Koe ‘uhi ko e faingata’a fakamāmani lahi ‘o e COVID-19, kuo hoko ‘a e 2020 mo e 2021 ko e ongo ta’u faingata’a ki Tonga, ‘Aositelēlia mo māmani kotoa. Ka neongo ia, ne malava pe ‘e he polokalama toli fua’i ‘akau (SWP) mo e taukei ngāue (PLS) ke fakaafe mai ha ngaahi faingamālie ma’ae kau ngāue Tonga, ‘o tokonia fakahangatonu ‘enau tu’unga fakapa’angá fakafo’ituitui mo fakafāmili foki, pea kei malava ai foki ke fakapapau’i ‘a e tupu ‘a e tu’unga faka’ekonomiká ma’a Tonga mo ‘Aositelelia fakatou’osi lolotonga ‘a e faingata’a ni.
Ko e Taumu’á:
- Ke katoanga’i mo vahevahe e ngaahi tapuaki mo e lelei ‘o e polokalama tolli fua’i ‘akau mo e taukei ngāue.
- Ke faka’ilonga’i ‘a e ngaahi ola lelei ‘o e polokalama toli fua’i ‘akau mo e taukei ngāue ki he mo’ui fakafo’ituitui pea mo e ongo fonuá foki. (Tonga mo ‘Aositelelia)
- Ke fakatokanga’i ‘a e ngaahi tokoni ‘oku fai ‘e he kau Faama mo e ngaahi kautaha ngāué pehē foki ki he kau ngāue Tongá.
- Ke faka’ilonga’i mo faka’ai’ai ange ‘a e va fengāue’aki ‘i he fanau ngāue toli fo’i ‘akau/taukei ngāue mo e kau faamá/kautahá mo e kau pule ngāué.
- Ke vahevahe mo faka’ai’ai ‘a e lelei ‘o e polokalama ngāué ni.
- Ke tu’uaki ‘a e mahu’inga ‘o e polokalama toli fua’i ‘akau mo e taukei ngāue ki he Pule’anga Tonga pea mo e Pule’anga ‘Aositelēlia.
Founga e kau mai:
Ko e ‘ata, tā fakatātā pe talanoa kotoa pe ‘e ‘omai pe fakahū mai, ‘oku mahu’inga ia ki he ‘Ofisi ‘o e ‘Eiki Talafekau Lahi ‘o Tonga ki he Pule’anga ‘Aositelēlia pea ‘e vahevahe atu ia ‘e he fakaafe ni. ‘E fakamahu’inga’i ‘a e ngaahi fakakaukau fo’ou, fakakaukau lelei mo langa hake, fakamānakó, mahino, fakakaukau ‘e fakatupunga mei ai ha ola lelei mo e ngāue fakataha ‘e ho’ata mei ho’omou ngaahi fakatātā. Kataki kae vahevahe mai mu’a ho’omou ngaahi talanoa melia mo homou ngaahi lelei kuo mou ‘inasi ai pea mo e ‘Ofisi ‘o e ‘Eiki Talafekau Lahi ‘o Tonga ‘i Kenipelá, pea ke tānaki pe fakahu mai ia kimu’a he ‘aho:
Tu’apulelulu, 30 ‘o Sepitema 2021, 5PM Taimi ‘a Kenipelá
Ko e ngaahi ‘ata, tavalivali mo e ngaahi talanoa kotoa pe ke fakahū kotoa mai pe ‘a e ngaahi me’a ni ki he email ngaue ‘a e ‘Ofisi ‘o e Talafekau Lahi Tonga ‘i Kenipela koe info@tongahighcom.com.au pe ko hano lī mai he meili ki he tu’asila:
High Commission of the Kingdom of Tonga
7 Newdegate St
Deakin, ACT 2600
Australia
Tel: + 612 6232 4806
Lao ‘o e Hiki Tatau
Koe’uhi ko e Lao ‘o e hiki tataú, ‘oku faka’amu ‘a e ‘Ofisi ‘o e ‘Eiki Talafekau Lahí ke fakahā mahino mai ‘a e hingoa ‘uluaki mo e hingoa fakafāmili, tu’asila, tu’asila meili faka’ilekitulōnika, fika telefoni mo ha ki’i puipuitu’a ‘o ho’o ‘ata, tā fakatātā pe talanoa ‘oku ke kau mai ‘aki ki he fe’auhi, ‘o fakafuofua ki ha vaeua ‘o ha la’i pepa A4. Ko e me’a kotoa pe te ke fakahū mai ‘o ke kau he fe’auhi ke fakamahino mai ‘oku faka’ata ke ngāue ‘a e ‘atā ki ai.
Ke toe Fakafoki atu:
Kātaki kae fakamahino mai pe ki he ‘Ōfisi Talafekau Lahi pe ‘oku ke faka’amu ke toe fakafoki atu ‘a ho’o ‘ata, ta valivali, talanoa ‘i he hili ‘a e faka’ali’ali mo e fe’auhi.
Pale:
‘E fili ‘e he ‘Ōfisi ‘o e ‘Eiki Talafekau Lahi ‘o Tonga ‘a e ngāue lelei tahá, pea ‘e fai’aki ia ‘a e Talamonū FakaKilisimasi ‘a e Ta’ahine Pilinisesi Angelika Lātūfuipeka Tuku’aho ka ko e ‘Eiki Talafekau Lahi ‘o Tonga ki ‘Aositelelia ‘i he’ene kaati fakakilisimasi 2021.
Ko e ngaahi ngāue lelei taha ‘e 3 tu’ukimu’á ‘e foaki foki kiate kinautolu ‘a e
Pale 1, AUD $3, 000.00
Pale 2, AUD $2, 000.00
Pale 3, AUD $1, 000.00
‘Ikai ngata ai, ko e ngaahi ngāue tu’ukimu’a taha ‘e 20 ‘e fakakau atu ki ha faka’ali’ali mavahe he konga kimui ‘o e ta’u ni ke faka’ilonga’i ‘a e mahu’inga ‘o e polokalama toli fua’i ‘akau pea mo e taukei ngāue ki Pule’anga Tonga pea mo e Pule’anga ‘Aositelēlia.
Faka’eke’eké mo ha tokoni fakapa’anga:
Ki ha toe faka’eke’eke pe ko ha tokoni ki hono fakapa’anga ‘o e polokalama faka’ali’ali, kataki ka ke fetu’utaki mai pe ki he ‘Ōfisi ‘o e ‘Eiki Talafekau Lahi ‘o Tonga ki ‘Aositelelia ‘i Kenipela ki he ngaahi fakaikiiki ‘i he ‘imeili ko e info@tongahighcom.com.au pe ko e fetu’utaki mai ki he telefoni ngaue ‘a e ‘Ofisi ‘o e ‘Eiki Talafekau Lahi ‘o Tonga ki ‘Aositelelia, fika telefoni ko e: + 612 6232 4806.
‘Oku fiefia ‘a e ‘Ofisi ‘o e ‘Eiki Talafekau Lahi ‘o Tonga ki ‘Aositelelia ke ma’u mo tali ho’omou ngaahi ‘ata, ta fakatātā, talanoá mo e fakamatalá. Manatu’i pe ‘a e ‘aho ‘oku tāpuni ki ai ‘a hono tali ‘o e ngaahi me’a ki he fe’auhi. Mālō ‘aupito mo e fakatauange pe ki he lelei tahá ma’a kimoutolu kotoa.
‘Ofisi ‘o e ‘Eiki Talafekau Lahi ‘o Tonga
Kenipela
