‘I HONO NGAUE’AKI ‘o e ngaahi mafai kuo foaki ‘e he kupu 37 mo e 39 ‘o e Lao ki hono Pule’i ‘o e Ngaahi Me’a Fakafokifa [Vahe 7.02] pea ‘i hono tali ‘o e –
A fakahā kuo fakahoko ‘e he Kautaha Mo’ui ‘a Mamani fekau’aki mo e Novel Coronavirus (“COVID-19”) ko e mahaki ‘oku mafola fakamamani lahi pea ‘oku kei fakalalahi;
B tu’utu’uni ki he Ngaahi Tu’utu’uni Fakahā ‘o ha Tu’unga Fakatu’utamaki ki he Mo’ui (COVID-19) 2020, ‘i hono fakatonutonu tukukehe ka toe fakalōloa ‘i he kupu 167 ‘o e Lao ki he Mo’ui ‘a e Kakai [Vahe 12.15] mo e Fakahā ‘o ha Mahaki Fanongonongo Fakatu’utamaki ‘i he ‘aho 11 ‘o Ma’asi 2021 mo e ngaue ke ta’ofi mo fakasi’isi’i ‘a e mafola ‘a e COVID-19 ‘i Tonga; mo e
C Fakafo’ou ‘o e fakahā ‘o ha Tu’unga Fakafokifa ‘i he ‘aho 12 ‘o ‘Epeleli 2021,
‘oku fakahoko heni ‘e he Komisiona ‘o e Polisi Tonga mo e ‘Eikitau ‘o e Kau Tau ‘a ‘Ene ‘Afio, ko e ongo ‘ofisa kuo fakamafai ‘i he kupu 36(2) ‘o e Lao ki hono Pule’i ‘o e Ngaahi Me’a Fakafokifa 2007 ‘a e Ngaahi Fekau ni –
(1) Kuo pau ke kamata ngaue’aki ‘a e Ngaahi Fekau ni mei he 8:00 efiafi ‘o e ‘aho Monite 12 ‘o ‘Epeleli 2021 ki he 8:00 efiafi ‘o e ‘aho Monite 10 ‘o Mē 2021 pea kuo pau ke ngaue’aki ki he ngaahi feitu’u kuo fakamahino ‘i he Fakafo’ou ‘o e Fakahā ‘o e Tu’unga Fakafokifa ‘o e ‘aho 12 ‘o ‘Epeleli 2021, tuku kehe ‘o ka toe fakafo’ou.
(2) Koe’uhi ko e ngaahi taumu’a ‘o e Fekau ni, tukukehe ka fiema’u ha ‘uhinga kehe ‘i hono tu’unga –
“kau ‘ofisa fakamafai” ‘oku ‘uhinga ki ha taha pe fa’ahinga ‘o ha ni’ihi kuo fakamafai’i ‘o fakatatau ki he kupu 36 ‘o e Lao ki he Pule’i ‘o e Me’a Fakafokifa 2007 mo ha taha pe ni’ihi kuo fokotu’u ‘o fakatatau ki he kupu 177 mo e 178 ‘o e Lao ki he Mo’ui ‘a e Kakai 2008;
“naunau malu’i” ‘oku ‘uhinga ki ha fa’ahinga teunga ‘o kau kiai ‘a e holoholo, kofunima, vala pe me’angaue ‘oku ngaohi ke fakasi’isi’i ‘a e mafola ‘o e mahaki;
“fakataha’anga fakatokolahi” ‘oku ‘uhinga ki ha fakataha’anga ‘oku ‘ikai laka hake ‘a e tokolahi ‘i he toko 50 ‘i loto ‘i fale mo e toko 100 ‘i tu’a ‘i ha fa’ahinga fakataha’anga pe, tukukehe ‘a e ngaahi fakataha’anga lotu mo e ngaahi ako’anga; mo e
“vā mama’o fakaetangata” ‘oku ‘uhinga ki he tauhi ‘o e vā mama’o mita ‘e 1.5 mei ha taha pe ‘i he taimi kotoa pē.
(3) Kuo pau ke ngaue’aki ‘a e ngaahi tapui ‘o e fe’alu’aki ‘i he po’uli mei he taimi 12:00 tu’apo ki he taimi 5:00 pongipongi.
(4) Kuo pau ke fakamalohi’i ‘a e tapui ‘o e fe’alu’aki ‘i he po’uli ‘e he Polisi Tonga, Kau Tau ‘a ‘Ene ‘Afio mo e kau ‘ofisa fakamafai fekau’aki.
(5) Kuo pau ki he kotoa ‘o e ngaahi ouau mo e ngaahi fakataha’anga ‘i Tonga ni ke –
(a) ‘ikai toe laka hake ‘i he tokolahi kuo faka’uhinga’i ko e fakataha’anga fakatokolahi;
(b) Faipau ki he tauhi ‘o e vā mama’o fakaetangata; mo e
(c) Faipau ki he ngaahi tu’utu’uni ‘a e Potungaue Mo’ui fekau’aki mo e tauhi ‘o e ma’a mo e haisini.
(6) Kuo pau ke fakangatangata ha fakataha’anga ouau putu ki ha tokolahi ko e toko 50 ‘i loto ‘i fale mo e toko 100 ‘i tu’a pea ke ‘i ai mo ha ‘ofisa fakamafai ‘i he lolotonga ‘a e putu.
(7) Kuo pau ke ma’u ‘e he Polisi Tonga mo e Kau Tau ‘a ‘Ene ‘Afio mo ha kau ‘ofisa fakamafai ‘a e mafai ke fakamalohi’i ‘a e ngaahi Fekau ni, koe’uhi ko e ngaahi taumu’a ke malu’i ‘a e malu ‘a e kakai mo hono tauhi ‘o e malu ‘a e mo’ui ‘a e kakai.
(8) Kuo pau ke tauhi mo faka’ai’ai ‘a e vā mama’o fakaetangata ‘i he taimi kotoa pe pea kuo pau ke ngaue’aki ‘a e naunau malu’i ‘i he ‘ene ala lava.
(9) Kuo pau ke tauhi ‘e he taha kotoa ‘a e tauhi ‘o e nima ke ma’a pea kuo pau ke muimui pau ‘a e taha kotoa ki he Ngaahi Fale’i ki he Mo’ui ‘oku tuku atu ‘e he Potungaue Mo’ui felave’i mo e COVID-19.
(10) Kuo pau ke ngaue’aki ‘a e kotoa ‘o e ngaahi tu’utu’uni ‘i he ngaahi Fekau ni ki he taha kotoa pe.
