‘I HONO NGAUE’AKI ‘o e ngaahi mafai kuo foaki ‘i he kupu 37 mo e 39 ‘o e Lao ki hono Pule’i ‘o e Me’a Fakafokifa, ‘oku fakahoko ai heni ‘e he Komisiona ‘o e Polisi Tonga mo e ‘Eikitau ‘o e Kau Tau ‘a ‘Ene ‘Afio, ‘a ia ko e ongo ‘ofisa fakamafai ‘i he kupu 36(2) ‘o e Lao, ‘a e ngaahi fekau ni –
- ‘Oku tapui ‘a e kakai ‘o e fonua ‘i he Falaite 9 ‘o ‘Okatopa 2020, mei he feinga ke hu pe hu ki he Mala’e Vakapuna Fakavaha’apule’anga Fua’amotu. ‘Oku ‘ikai ngaue’aki eni ki he kau ngaue mahu’inga ‘o e Tonga Airports Limited, kau ngaue mahu’inga ki he Air Terminal Services, kau ngaue mahu’inga ‘a e Air New Zealand, kau ngaue mahu’inga ‘o e Va’a ki he Kakai Hu Mai mo e Kasitomu, kau ‘ofisa tali fakatu’utamaki mo e kau ‘ofisa tali fakatu’utamaki fakafaito’o ‘a ia kuo vahe’i ‘i he kupu 177 mo e 178 ‘o e Lao ki he Mo’ui ‘a e Kakai, kau ‘ofisa fakamafai ‘i he kupu 36 ‘o e Lao ki hono Pule’i ‘o e Me’a Fakafokifa, mo e kau pasese ‘oku nau folau atu ‘i he vakapuna.
- ‘Oku tapui ‘a e kakai ‘o e fonua ‘o kamata mei he 12:00 hengihengi ‘o e Falaite ‘aho 9 ‘o ‘Okatopa 2020 ki he 12:00 tu’apo ‘o e Monite ‘aho 26 ‘o ‘Okatopa 2020, mei he hū ki he Tanoa Dateline International Hotel, mo e ngaahi ‘elia ‘a ia ‘oku faka’ilonga’i ‘aki ‘a e ngaahi laine le’ohi ‘e he kau polisi mo e kau sotia mo e ngaahi vahevahe mo e tapuni ‘i he hala ‘o takai ‘i he ngaahi feitu’u ko ia. ‘Oku ha ‘a e ngaahi ‘elia ko ia ‘i he ngaahi mape ‘i he Tepile 1.
- Koe’uhi ke ‘oua ‘e ‘i ai ha tala’a, ‘oku ‘ikai ngaue’aki ‘a e palakalafi (2) ‘i ‘olunga ki he –
(1) kau ngaue mahu’inga ‘o e Tanoa Dateline International Hotel ‘o felave’i mo e Tanoa International Dateline Hotel;
(2) kau ‘ofisa tali fakatu’utamaki mo e kau ‘ofisa tali fakatu’utamaki fakafaito’o kuo vahe’i ‘i he kupu 177 mo e 178 ‘o e Lao ki he Mo’ui ‘a e Kakai; mo e
(3) kau ‘ofisa fakamafai ‘i he kupu 36 ‘o e Lao ki hono Pule’i ‘o e Me’a Fakafokifa.
Fakaha ‘i Nuku’alofa ‘i he ‘aho 8 ni ‘o ‘Okatopa 2020.
