Polokalama Fakaakeake ‘a e Pule‘anga Ma‘ae Ngaahi Pisinisi
11 Me, 2021 ‘Oku fanongonongo atu ‘a e Potungaue Fefakatau‘aki mo Fakalakalaka Faka‘Ekonomika (MTED) kuo kamata hono tuku atu e tokoni ‘a e Pule‘anga kia kinautolu na‘a nau tohi mai ki he polokalama fakaakeake fakapisinisi tu‘unga ‘i he mole faka‘ekonomika fakatupu ‘e he mahaki faka‘auha Covid-19.
‘I he lolotonga ni kuo tukuange atu ‘a e ngaahi tokoni ki he ni‘ihi ngaahi pisinisi mei he sekitoa te‘eki laiseni fefakatau‘aki (informal sector), ka ‘e toki fakakakato pea fanongonongo atu ‘i he kaha‘u vave mai ‘a e toenga ‘o e ngaahi tokoni ki he toenga kinautolu na‘e tohi kole mai.
Ko e Potungaue Pa‘anga (Ministry of Finance MOF) ‘oku ne tukuange ‘a e ngaahi tokoni ko eni pea te nau toki fetu‘utaki hangatonu pe kia kinautolu kuo paasi ke kau he tokoni.
Ko e Konga 3 eni ‘o e Polokalama ni (Business Recovery Support: COVID-19 Assistance Phase 3), pea na‘e ‘ataa e tohi ki ai ‘i Ma‘asi ki ‘Epeleli ‘o e ta‘u ni. ‘Oku kau ki heni ‘a e ngaahi pisinisi ‘osi laiseni (formal) pea mo te‘eki laiseni (informal).
‘Oku hounga ki he potungaue ni ‘a e fiengaue fakataha mo e kataki ‘a kinautolu kuo uesia ‘e he Covid-19 ‘enau ma‘u‘anga mo‘ui, pea mo fie kau mai ki he polokalama ni. ‘E tu‘ulahoko atu ai pe hono faka‘ilo atu ‘a hokohoko atu ‘o e polokalama ni ‘i he kaha‘u, kau ai e Konga 4 mo e 5.
NGATA’ANGA
Tuku atu mei he: Potungaue Fefakatau‘aki mo Fakalakalaka Faka‘Ekonomika (MTED)
